കരമനയില് 55 കാരനായ ശ്രീകണ്ഠന് നായരെ വീട്ടിനുള്ളില് മരിച്ച നിലയില് കണ്ടെത്തിയ സംഭവം കൊലപാതകമാണെന്ന് തെളിഞ്ഞു.സംഭവവുമായി ബന്ധപ്പെട്ട് അദ്ദേഹത്തോടൊപ്പം താമസിച്ചിരുന്ന കഴക്കൂട്ടം സ്വദേശി രൂപക് (35) പൊലീസിന്റെ പിടിയിലായി. കരമന പള്ളിത്താനം സ്വദേശിയായ ശ്രീകണ്ഠന് നായരെ ബുധനാഴ്ചയാണ് വീടിനുള്ളില് മരിച്ച നിലയില് കണ്ടെത്തിയത്. അന്നേദിവസം രാവിലെ അയല്വാസികളെയും പൊലിസിനെയും മരണവിവരം അറിയിച്ചതും പ്രതിയായ രൂപക് തന്നെയാണ്.
തുടര്ന്ന് സ്ഥലത്തെത്തിയ പൊലിസ് ഇന്ക്വസ്റ്റ് നടപടികള് പൂര്ത്തിയാക്കി. എന്നാല് പോസ്റ്റ്മോര്ട്ടം പരിശോധനയില് ശ്രീകണ്ഠന് നായരുടെ വാരിയെല്ലുകള് ഒടിഞ്ഞതായി കണ്ടെത്തിയതോടെയാണ് സ്വാഭാവിക മരണമല്ലെന്നും കൊലപാതകമാണെന്നും വ്യക്തമായത്. ഇതിനെത്തുടര്ന്ന് നടത്തിയ അന്വേഷണത്തില് രൂപക്കിനെ കാണാനില്ലെന്ന് മനസ്സിലാക്കിയ പൊലിസ് സംഘം കിഴക്കേകോട്ട ഭാഗത്തുനിന്ന് ഇയാളെ കസ്റ്റഡിയിലെടുക്കുകയായിരുന്നു.
