താനൂര് ബോട്ടപകടം, മരിച്ചവരില് ഒരു കുടുംബത്തില് നിന്നുള്ള 14 പേര്, തിങ്കളാഴ്ച സംസ്ഥാനത്ത് ഔദ്യോഗിക ദുഃഖാചരണം
മലപ്പുറം താനൂരിലുണ്ടായ ബോട്ട് ദുരന്തത്തില് മരണസംഖ്യ ഉയരുന്നു. അപകടത്തില് ഒരു കുടുംബത്തില് നിന്നുള്ള 14 പേര് ദാരുണമായി മരിച്ച വാര്ത്ത നാടിനെ കണ്ണീരിലാഴ്ത്തി.ഒരു കുട്ടി അത്യാസന്ന നിലയിലുമാണ്. പരപ്പനങ്ങാടി പുത്തന്കടപ്പുറത്തെ കുന്നുമ്മല് കുടുംബത്തിലെ ജാബിറിന്റെ ഭാര്യ ജല്സിയ എന്ന കുഞ്ഞിമ്മു (42) മകന് ജറീര് (12) മകള് ജന്ന (8), സൈതലവിയുടെ ഭാര്യ സീനത്ത് (43) മക്കളായ അസ്ന (18 ), ഷംന (16) സഫ്ല (13 ), ഫിദദില്ന (8) സഹോദരി നുസ്റത്ത് (35), മകള് ആയിഷ മെഹ്രിന് (ഒന്നര), സഹോദരന് സിറാജിന്റെ ഭാര്യ റസീന (27) ഷഹറ (8) ഫാത്തിമ റിഷിദ (7) നൈറ ഫാത്തിമ (8മാസം) എന്നിവരാണ് മരിച്ചത്. അതേസമയം പ്രധാനമന്ത്രി നരേന്ദ്രമോദിയും, ഉപരാഷ്ട്രപതിയും ബോട്ടപകടത്തില് ദുഃഖം രേഖപ്പെടുത്തി. മരിച്ചവരുടെ കുടുംബങ്ങള്ക്ക് ദേശീയ ദുരിതാശ്വാസ നിധിയില് നിന്ന് രണ്ടു ലക്ഷം രൂപ വീതം ധനസഹായം പ്രഖ്യാപിച്ചു. ബോട്ട് ദുരന്തത്തിന്റെ പശ്ചാത്തലത്തില് തിങ്കളാഴ്ച സംസ്ഥാനത്ത് ദുഃഖാചാരണം പ്രഖ്യാപിച്ചിട്ടുണ്ട്.