തൊഴിലാളികൾക്കിടയിലേക്ക് കാർ പാഞ്ഞുകയറി ഒരാൾ മരിച്ചു

തിരുവനന്തപുരം: കവടിയാർ – പേരൂർക്കട റോഡിൽ അമ്പലമുക്കിൽ റോഡിനോട് ചേർന്ന് കേബിൾ ജോലികൾ ചെയ്‌തുകൊണ്ടിരുന്നവർക്കിടയിലേക്ക് കാർ പാഞ്ഞുകയറി ഒരാൾ മരിച്ചു. ബി.എസ്.എൻ.എൽ കരാർ തൊഴിലാളിയായ ജോൺ ഫ്രെഡോ ആണ് മരിച്ചത്. അപകടമുണ്ടാക്കിയ അമ്പലമുക്ക് സ്വദേശി അജയഘോഷിനെ (58)​ പേരൂർക്കട പൊലീസ് കസ്‌റ്റഡിയിലെടുത്തു. ഇയാളുടെ കാറും കസ്റ്റഡിയിലെടുത്തിട്ടുണ്ട്. ഇന്നലെ രാത്രി 10.45ന് അമ്പലമുക്ക് കുരിശടി ജംഗ്ഷനിലായിരുന്നു അപകടം. റോഡിൽ കേബിൾ ഇടുന്നതിനായി ഒരുവശത്ത് ബാരിക്കേഡ് സ്ഥാപിച്ച ശേഷം ജോലികൾ നടക്കുകയായിരുന്നു. ഇതുവഴി ഗതാഗതവും തിരിച്ചുവിട്ടിരുന്നു. പേരൂർക്കടയിൽ നിന്ന് അമ്പലമുക്കിലേക്ക് അമിതവേഗത്തിലെത്തിയ കാർ ബാരിക്കേഡിലേക്ക് ഇടിച്ചുകയറുകയായിരുന്നു. കാറിന്റെ വരവുകണ്ട് മറ്റ് തൊഴിലാളികൾ ഓടിമാറിയെങ്കിലും ജോൺ കാറിനും ബാരിക്കേഡിനും ഇടയിൽ അകപ്പെടുകയായിരുന്നു. ഗുരുതരമായി പരിക്കേറ്റ ജോണിനെ ഉടൻ പേരൂർക്കട പൊലീസെത്തി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും മരണം സംഭവിച്ചു. കാർ അമിതവേഗത്തിലായിരുന്നെന്ന് ദൃക്‌സാക്ഷികൾ പറഞ്ഞു