കാൽനൂറ്റാണ്ട് തരിശ് കിടന്ന പാടശേഖരം വീണ്ടെടുത്തതിന് ശേഷം നടക്കുന്ന ഏഴാമത്തെ കൊയ്ത്ത് ഉത്സവം അതിഗംഭീരമായി പിരപ്പമൺകാട് കൊണ്ടാടുകയുണ്ടായി. സമ്മേളന ഉദ്ഘാടനവും ജില്ലാ പഞ്ചായത്ത് പാടശേഖരസമിതിക്ക് നൽകിയ കാർഷിക യന്ത്രങ്ങളുടെ കൈമാറൽ ചടങ്ങും ജില്ലാ പഞ്ചായത്ത് പ്രസിഡന്റ് വി. പ്രിയദർശിനി നിർവഹിച്ചു. കന്നിക്കൊയ്ത്ത് ഉദ്ഘാടനം ജില്ലാ പഞ്ചായത്ത് വൈസ് പ്രസിഡന്റ് ബിപി മുരളി നിർവഹിച്ചു. പാടശേഖരത്തിലെ എല്ലാ പ്രവർത്തനങ്ങൾക്കും ഒപ്പം കലാസാംസ്കാരിക പരിപാടികൾ സംഘടിപ്പിക്കുന്നതിന്റെ ഭാഗമായി ഇത്തവണ കുട്ടികളുടെ കർഷക വേഷപ്പകർച്ച മത്സരം സംഘടിപ്പിക്കപ്പെട്ടു. 62 കുട്ടികൾ രജിസ്റ്റർ ചെയ്ത് മത്സരത്തിൽ പങ്കെടുത്തു. മുഴുവൻ കുട്ടികൾക്കും പാടശേഖരസമിതി മമെന്റോ നൽകുകയുണ്ടായി. ജില്ലാ പഞ്ചായത്ത് മെമ്പർ കാർത്തിക എസ് കുട്ടികൾക്ക് ഉപഹാരങ്ങൾ നൽകി..പൂവത്തറ തെക്കത് ആറാട്ടുകടവിൽ സംഘടിപ്പിച്ച ഉദ്ഘാടന പരിപാടി ജനപങ്കാളിത്തം കൊണ്ട് മുൻകാലങ്ങളേക്കാൾ ഏറെ ശ്രദ്ധേയമായി.. കൃഷിയെ സ്നേഹിക്കുന്നവരുടെ പരസ്പര സാമ്പത്തിക സഹായ കൂട്ടായ്മയായ കർഷക സഞ്ചിത നിധിയുടെ പ്രതിമാസ നറുക്കെടുപ്പ് കൃഷിവകുപ്പ് ഡെപ്യൂട്ടി ഡയറക്ടർ പ്രേമവല്ലി നടത്തുകയുണ്ടായി.
പാടശേഖരത്തിൽ ഉത്പാദിപ്പിക്കപ്പെടുന്ന മുഴുവൻ നെല്ലും മൂല്യവർദ്ധിത ഉൽപ്പന്നങ്ങൾ ആക്കി വിപണനം ചെയ്യുന്നതിന് സഹായകരമായ രീതിയിൽ പാടശേഖരത്തിൽ രൂപീകൃതമായ ഫാർമർ പ്രൊഡ്യൂസർ ഓർഗനൈസേഷന് എല്ലാവിധ സഹായവും ചെയ്യുമെന്നും , കൂടുതൽ സന്ദർശകരെ പാടശേഖരത്തിലേക്ക് ആകർഷിക്കുന്നതിനും ടൂറിസം സാധ്യതകൾ വികസിപ്പിക്കുന്നതിനും ആയി ഒരു ഹാപ്പിനസ് പാർക്ക് വയൽ പ്രദേശത്ത് സ്ഥാപിക്കുമെന്നും ജില്ലാ പഞ്ചായത്ത് പ്രസിഡന്റ് ,വൈസ് പ്രസിഡന്റ് എന്നിവർ ഉറപ്പു നൽകി.
ജില്ലാ പഞ്ചായത്ത് അനുവദിച്ച മുഴുവൻ കാർഷിക യന്ത്രങ്ങളുടെയും പ്രദർശനവും ഇതോടനുബന്ധിച്ച് ഒരുക്കിയിരുന്നു.
മുദാക്കൽ ഗ്രാമപഞ്ചായത്ത് പ്രസിഡന്റ് വി ഷൈനി അധ്യക്ഷത വഹിച്ച യോഗത്തിൽ പാടശേഖര സമിതി പ്രസിഡന്റ് വി ആർ സാബു സ്വാഗതവും സൗഹൃദ സംഘം കൺവീനർ ബിജു മാറ്റാടി നന്ദിയും പറഞ്ഞു.. ബ്ലോക്ക് പഞ്ചായത്ത് മെമ്പർ അഡ്വ: ലിഷാരാജ് , ഗ്രാമപഞ്ചായത്ത് മെമ്പർമാരായ വിജയകുമാർ , ശ്രീക്കുട്ടി , ഉപദേശക സമിതി അംഗങ്ങളായ എസ്.ശരുൺകുമാർ , ബി രാജീവ്, വിജു കോരാണി എന്നിവർ ആശംസകൾ അർപ്പിച്ച് സംസാരിച്ചു.