വർക്കലയിൽ റെയിൽവേ ട്രാക്കിനു സമീപം തീപ്പിടിത്തം വൻ അപകടം ഒഴിവായി.

വർക്കല: തീവണ്ടി കടന്നുപോകുന്ന സമയത്ത് വർക്കലയിൽ റെയിൽവേ ട്രാക്കിനു സമീപം തീപ്പിടിത്തം. മട്ടിൻമൂട് ജങ്ഷനു സമീപം റെയിൽവേ ട്രാക്കിനു സമീപത്തെ പുൽക്കാടിനും ചപ്പുചവറുകൾക്കുമാണ് തീപിടിച്ചത്. സമീപത്തെ അഗ്നിരക്ഷാനിലയത്തിലെ ഉദ്യോഗസ്ഥന്റെ ശ്രദ്ധയിൽപ്പെട്ടതിനാൽ പെട്ടെന്നെത്തി തീകെടുത്തി അപകടമൊഴിവാക്കാനായി.
ചൊവ്വാഴ്ച രാത്രി 12.45-ഓടെ എസ്.ആർ. തിയേറ്ററിന് എതിർവശത്തെ പെട്ടിക്കടകൾക്ക് പിന്നിലായാണ് തീ കണ്ടത്. വർക്കല അഗ്നിരക്ഷാനിലയത്തിൽ പാറാവ് ഡ്യൂട്ടിയിലുണ്ടായിരുന്ന ഓഫീസർ ഉണ്ണികൃഷ്ണനാണ് തീ പടരുന്നത് കണ്ടത്. ഉടൻ സേനാംഗങ്ങളെ അറിയിക്കുകയും വാഹനവുമായി സ്ഥലത്തെത്തി തീ കെടുത്തുകയായിരുന്നു.
തീപ്പിടിത്തമുണ്ടായ സമയം ഇതുവഴി തീവണ്ടി കടന്നുപോയിരുന്നു. ട്രാക്കിനു തൊട്ടടുത്തേക്ക് എത്തുന്നതിനു മുമ്പ് തീകെടുത്തിയതിനാൽ വലിയ അപകടമാണ് ഒഴിവായത്