കിഫ്ബി ഫണ്ട് ഉപയോഗിച്ച് മണ്ണന്തല പൗഡിക്കോണം റോഡ് നിർമാണം ഉടൻ ആരംഭിക്കും

തിരുവനന്തപുരം: കഴക്കൂട്ടം മണ്ഡലത്തിൽ16 കോടി രൂപ ചെലവഴിച്ച് നിർമിച്ച വിവിധ റോഡുകളുടെ ഉദ്ഘാടനം പൊതുമരാമത്ത് വകുപ്പ് മന്ത്രി ജി സുധാകരൻ നിർവഹിച്ചു. സിആർഎഫ് പദ്ധതി പ്രകാരം 10 കോടി രൂപ ചിലവഴിച്ച് നിർമിച്ച പൗഡിക്കോണം – അയിരൂപ്പാറ – പോത്തൻകോട് റോഡ്, ചെല്ലമംഗലം-ഉദയഗിരി റോഡ്, പുളിയൻകോട് – അംബേദ്കർ കോളനി റോഡ്, കരിമ്പുവിള പാലം, നബാർഡ് പദ്ധതി പ്രകാരം 6 കോടി രൂപ ചിലവഴിച്ച് നിർമിച്ച പൗഡിക്കോണം – കത്തിക്കൽ – വട്ടക്കരിക്കകം – അരുവിക്കരക്കോണം – ശാന്തിപുരം – കല്ലടിച്ചവിള – സ്വാമിയാർമഠം റോഡ് എന്നിവയുടെ ഉദ്ഘാടനമാണ് മന്ത്രി നിർവഹിച്ചത്. മന്ത്രി കടകംപള്ളി സുരേന്ദ്രന്റെ പ്രത്യേക താത്പര്യത്തെ തുടർന്നാണ് ഈ റോഡുകൾ കഴക്കൂട്ടം മണ്ഡലത്തിൽ അനുവദിച്ചതെന്ന് മന്ത്രി പറഞ്ഞു. യോഗത്തിന് കഴക്കൂട്ടം എംഎൽഎ കൂടിയായ മന്ത്രി കടകംപള്ളി സുരേന്ദ്രൻ അധ്യക്ഷനായി. കഴക്കൂട്ടം മണ്ഡലത്തിൽ സമാനതകളില്ലാത്ത വികസന പ്രവർത്തനങ്ങളാണ് നടപ്പിലാക്കുന്നത് എന്നും 14 മീറ്റർ വീതിയിൽ കിഫ്ബി ഫണ്ട് ഉപയോഗിച്ച് നിർമിക്കുന്ന മണ്ണന്തല പൗഡിക്കോണം റോഡ് നിർമാണം ഉടൻ ആരംഭിക്കുമെന്നും കടകംപള്ളി സുരേന്ദ്രൻ പറഞ്ഞു. യോഗത്തിൽ നഗരസഭ സ്റ്റാന്റിംഗ് കമ്മിറ്റി ചെയർമാൻ സി സുദർശനൻ, കൗൺസിലർമാരായ കെ എസ് ഷീല, നാരായണ മംഗലം രാജേന്ദ്രൻ, പ്രദീപ്കുമാർ എന്നിവർ പങ്കെടുത്തു