വീടിന്റെ വാതിൽ കുത്തിപ്പൊളിച്ച് പണം കവർന്നു

കല്ലമ്പലം: ബന്ധുവീട്ടിൽ മക്കളുമായി മരണാനന്തര ചടങ്ങിനു പോയ വീട്ടമ്മയുടെ വീടിന്റെ അടുക്കള വാതിൽ കുത്തി തുറന്ന് പണം കവർന്നു. നാവായിക്കുളം കപ്പാംവിള അജ്മൽ മൻസിലിൽ ജാൻസിയുടെ വീട്ടിലാണ് കഴിഞ്ഞ ദിവസം രാവിലെ 11നും 12 നുമിടയ്ക്ക് കവർച്ച നടന്നത്. അടുക്കള വാതിലിലൂടെ അകത്തുകടന്ന മോഷ്ടാക്കൾ രണ്ട് അലമാര കുത്തിത്തുറന്ന് 15000 രൂപയോളം കവർന്നു. അലമാരയിൽ സൂക്ഷിച്ചിരുന്ന സ്വർണ്ണാഭരണങ്ങൾ ജാൻസി ധരിച്ചുകൊണ്ടുപോയതിനാൽ നഷ്ടമായില്ല. ചടങ്ങുകൾ കഴിഞ്ഞ്‌ ജാൻസി വീട്ടിൽ തിരിച്ചെത്തിയപ്പോൾ അടുക്കള വാതിൽ തുറന്ന് കിടക്കുന്നതുകണ്ട് അകത്ത് ആളുണ്ടാകുമെന്ന് കരുതി ഭയന്ന് സമീപവാസികളെ വിളിച്ചു കൂട്ടി പരിശോധിച്ചപ്പോഴാണ് കവർച്ച നടന്നതായി മനസിലായത്. തുടർന്ന് കല്ലമ്പലം പൊലീസിൽ പരാതി നൽകി. പൊലീസെത്തി പരിശോധന നടത്തി.