ദുബായ്: യുഎഇയിലെ സിവില് കോടതികളുടെ വിധികള് ഇനി മുതല് ഇന്ത്യയില് നടപ്പാക്കാനാകും. ഇന്ത്യയിലെ ജില്ലാ കോടതികള് വഴി വിധി നടപ്പാക്കാന് കേന്ദ്ര സര്ക്കാര് വിജ്ഞാപനമിറക്കി. ഇതോടെ യുഎഇയില് കേസുകളില് പെട്ട് നാട്ടിലേക്ക് കടന്നവര്ക്കെതിരെ ഇന്ത്യയിലെ കോടതികള് വഴി നടപടി സ്വീകരിക്കാനാകും.ജനുവരി 18-നാണ് യുഎഇയിലെ കോടതിവിധി ഇന്ത്യയില് നടപ്പാക്കുന്നത് സംബന്ധിച്ച് ഇന്ത്യന് സര്ക്കാര് ഗസറ്റ് വിജ്ഞാപനം ഇറക്കിയത്. യുഎഇയിലെ ഏതൊക്കെ കോടതികളുടെ വിധികളാണ് ഇന്ത്യയില് നടപ്പാക്കുകയെന്ന് നിയമ മന്ത്രാലയം വിജ്ഞാപനത്തില് വ്യക്തമാക്കിയിട്ടുണ്ട്.
യുഎഇയിലെ സിവില്, കമേഴ്സ്യല് കോടതി വിധികള് ഇന്ത്യയില് നടപ്പാക്കുന്നത് സംബന്ധിച്ച് 1999-ല് ധാരണയിലെത്തിയിരുന്നുവെന്നും അതിന്റെ വിജ്ഞാപനമാണ് ഇപ്പോള് ഇറക്കിയതെന്നും യുഎഇയിലെ ഇന്ത്യന് സ്ഥാനപതി പവന് കപൂര് പറഞ്ഞു.
യു .ഏ. ഇ 2000-ല് തന്നെ കരാര് പ്രാബല്യത്തിലാക്കാനുള്ള നടപടികളെടുത്തിരുന്നു.
കേസില് വിധി വന്ന ശേഷം യുഎഇ വിടുന്നവര്ക്കെതിരായ വിധി ഇനി ഇന്ത്യയില് നടപ്പാക്കാന് സാധിക്കും. എന്നാല് യുഎഇയില് നിന്ന് സാമ്പത്തിക തട്ടിപ്പ് നടത്തി കേസ് തുടങ്ങുന്നതിന് മുമ്പ് രാജ്യം വിട്ടവര്ക്കെതിരായ വിധി ഇന്ത്യയില് നടപ്പാക്കാനാവില്ല.
വിവാഹ മോചന കേസുകളിലും കുട്ടികളുടെ രക്ഷകര്തൃത്വം നിശ്ചയിക്കുന്നതിനുള്ള കേസുകളിലും സ്വത്തവകാശ കേസുകളിലുമുള്ള വിധികള് നടപ്പാക്കാനാകും. സാമ്പത്തിക തട്ടിപ്പു കേസുകളിലെ വിധി നടപ്പാക്കാനും പുതിയ നിയമത്തിലൂടെ സാധിക്കും.രണ്ട് രാജ്യങ്ങളും തമ്മിലുള്ള ധാരണപ്രകാരം അധികാരമുള്ള കോടതികളുടെ വിധിയാണ് നടപ്പാക്കുക. യുഎഇയിലെ ഫെഡറല് സുപ്രീം കോടതി, അബുദാബി, ഷാര്ജ, അജ്മാന്, ഉമ്മുല് ഖുവൈന്, ഫുജൈറ എന്നിവിടങ്ങളിലെ ഫെഡറല്, ഫസ്റ്റ് ഇന്സ്റ്റന്സ്, അപ്പീല് കോടതികള്, അബുദാബി ജുഡീഷ്യല് ഡിപ്പാര്ട്ട്മെന്റ്, ദുബായി കോടതികള്, റാസല്ഖൈമ ജുഡീഷ്യല് ഡിപ്പാര്ട്ട്മെന്റ്, അബുദാബി ഗ്ലോബല് മാര്ക്കറ്റ് കോടതി, ദുബായ് ഇന്റര്നാഷണല് ഫിനാന്ഷ്യല് സെന്റര് കോടതി എന്നിവയുടെ വിധികളാണ് ഇന്ത്യയില് നടപ്പാക്കാന് സാധിക്കുക.
