പ്രീമിയം ഹാച്ച്ബാക്ക് സെഗ്മെന്റിൽ ടാറ്റ മോട്ടോഴ്സിന് സാന്നിദ്ധ്യമില്ല എന്നുള്ള പേരിനു വിരാമമിട്ട് ആൽട്രോസ് വിപണിയിലെത്തി. മാരുതി സുസുക്കി ബലേനോയും, ഹ്യൂണ്ടായ് എലീറ്റ് i20-യും അരങ്ങു വാഴുന്ന പ്രീമിയം ഹാച്ച്ബാക്ക് സെഗ്മെന്റിൽ യഥാർത്ഥത്തിൽ വൈകിയാണ് ആൽട്രോസിന്റെ വരവ്. ലേറ്റ് ആയി വന്നാലും ലേറ്റസ്റ്റ് ആയി വരും എന്നുള്ള പറച്ചിൽ അന്വർത്ഥമാക്കിയാണ് ആൽട്രോസിന്റെ വരവ്. പ്രീമിയം ഹാച്ച്ബാക്ക് സെഗ്‌മെന്റിന്റെ ‘ഗോൾഡ് സ്റ്റാൻഡേർഡ്’ എന്ന് ടാറ്റ മോട്ടോർസ് അവകാശപ്പെടുന്ന ആൽട്രോസിനെ അടുത്തറിയാം.
5.29 ലക്ഷം രൂപയാണ് ടാറ്റ ആൽട്രോസിന്റെ ബേസ് മോഡലിന്റെ വില. എതിരാളികളെ ഭയപ്പെടുത്തും ഈ വില എന്നുള്ളത് വ്യക്തം. ടോപ്-എൻഡ് ഡീസൽ വേരിയന്റിന് 9.29 ലക്ഷം ആണ് എക്‌സ്-ഷോറൂം വില.
ടാറ്റ ആൽട്രോസ് പെട്രോൾ
XE – Rs 5.29 ലക്ഷം
XM – Rs 6.15 ലക്ഷം
XT – Rs 6.84 ലക്ഷം
XZ – Rs 7.44 ലക്ഷം
XZ (O) – Rs 7.69 ലക്ഷം
ടാറ്റ ആൽട്രോസ് ഡീസൽ
XE – Rs 6.99 ലക്ഷം
XM – Rs 7.75 ലക്ഷം
XT – Rs 8.44 ലക്ഷം
XZ – Rs 9.04 ലക്ഷം
XZ (O) – Rs 9.29 ലക്ഷം
പ്രീമിയം + സ്‌പോർട്ടി ഡിസൈൻ
ഒന്നുകിൽ സ്‌പോർട്ടി അല്ലെങ്കിൽ പ്രീമിയം ഈ രീതിയിൽ ആയിരിക്കും സാധാരണ ഗതിയിൽ പ്രീമിയം ഹാച്ച്ബാക്കുകളുടെ ഡിസൈൻ ഭാഷ്യം. പക്ഷെ ഇത് രണ്ടും ഒരുപോലെ സമന്വയിപ്പിച്ച ഡിസൈൻ ആണ് ആൽട്രോസിന്. ഹാരിയർ എസ്‌യുവി തുടക്കം വച്ച ‘ഇംപാക്ട് ഡിസൈൻ 2.0’ ഡിസൈൻ ഭാഷ്യമാണ് ആൽട്രോസിനും. സ്‌പോർട്ടി സ്റ്റാൻസ്, എയ്‌റോഡൈനമിക്കായ ബോഡി, കട്ടി കൂടിയ ഷോൾഡർ ലൈൻ, കറുപ്പ് നിറത്തിന്റെ ഹൈലൈറ്റ്സ് എന്നിവ ആൽട്രോസിന്റെ ഭംഗി വർധിപ്പിക്കുന്നു. വലിപ്പമേറിയ ടയറുകളും മെഷീൻ-കട്ട് അലോയ് വീലുകളും വശങ്ങളിൽ ആകർഷണം ആവുമ്പോൾ, വ്യത്യസ്തമായ പിൻ രൂപശൈലിയാണ് ആല്‍ട്രോസിന്. ടെയിൽലാംപ് ക്ലസ്റ്ററിനു ശേഷം ശേഷം അകത്തേക്ക് അല്പം ഇറങ്ങിയിരിക്കുന്ന ബോഡി പാനൽ ആൽട്രോസിന്റെ സ്പോർട്ടിനെസ്സ് വർധിപ്പിക്കുന്നു.
എലഗന്റ് ഇന്റീരിയർ
കറുപ്പ്, ഗ്രേ നിറങ്ങളുടെ ഡ്യുവൽ ടോൺ ഫിനിഷാണ് ആൽട്രോസിന്റെ സീറ്റ് അപ്ഹോൾസ്റ്ററിക്ക്. കറുപ്പ് നിറത്തിലുള്ള ഡാഷ്ബോർഡിന് പുതുമ അവകാശപ്പെടാനില്ലെങ്കിലും ഒരു എക്സിക്യൂട്ടീവ് സ്റ്റാൻസ് ആണ്. ഫ്രീ സ്റ്റാന്റിംഗ് 7-ഇഞ്ച് ഇൻഫോടെയ്ൻമെൻ്റ് സിസ്റ്റത്തിന്റെ ഡിസ്പ്ലേ ടാറ്റ കാറുകളെ സംബന്ധിച്ച് പുതുമയുള്ളതാണ്. ഫ്ലാറ്റ് ബോട്ടം സ്റ്റിയറിംഗ് വീൽ, ഡിജിറ്റൽ-അനലോഗ് ഇൻസ്ട്രുമെൻ്റ് ക്ലസ്റ്റർ, ആൻഡ്രോയിഡ് ഓട്ടോ, ആപ്പിൾ കാർപ്ലേയ് കണക്റ്റിവിറ്റി സൗകര്യമുള്ള ഇൻഫോടെയ്ൻമെൻ്റ് സിസ്റ്റം എന്നിവയാണ് ഇന്റീരിയറിലെ മറ്റുള്ള ആകർഷണങ്ങൾ.
പുത്തൻ പ്ലാറ്റ്‌ഫോം, BS6 എൻജിൻ
Agile Light Flexible Advanced അഥവാ ആൽഫാ (ALFA) എന്ന് ടാറ്റ പേരിട്ടു വിളിക്കുന്ന പുത്തൻ പ്ലാറ്റ്ഫോമിൽ നിർമിച്ചിരിക്കുന്ന ആദ്യ വാഹനമാണ് ആൽട്രോസ്. 86 പിഎസ് പവറും 113 എൻഎം ടോർക്കും നിർമിക്കുന്ന 1.2-ലിറ്റർ നാച്ചുറലി അസ്പിറേറ്റഡ് 3-സിലിണ്ടർ പെട്രോൾ, 90 പിഎസ് പവറും 200 എൻഎം ടോർക്കും നിർമിക്കുന്ന 1.5-ലിറ്റർ ഡീസൽ എന്നിവയാണ് എൻജിൻ ഓപ്ഷനുകൾ. പെട്രോൾ എൻജിൻ ടിയാഗോയിൽ നിന്ന് കടമെടുത്തതും ഡീസൽ എൻജിൻ നെക്‌സോണിൽ നിന്ന് കടമെടുത്തതുമാണ്. സിറ്റി, ഈക്കോ എന്നിങ്ങനെ രണ്ട് ഡ്രൈവിംഗ് മോഡുകളും ഉള്ള ആൽട്രോസ് തുടക്കത്തിൽ 5-സ്പീഡ് മാന്വൽ ഗിയർബോക്‌സിൽ മാത്രമാണ് ലഭിക്കുക.
ഫീച്ചർ സമൃദ്ധം
സെഗ്‌മെന്റിന്റെ ‘ഗോൾഡ് സ്റ്റാൻഡേർഡ്’ എന്ന് ടാറ്റ മോട്ടോർസ് അവകാശപ്പെടും വിധം ഫീച്ചറുകളുടെ നീണ്ട നിര തന്നെ ആൽട്രോസിനുണ്ട്. 6-സ്പീക്കർ ഹർമൻ സൗണ്ട് സിസ്റ്റം, ക്രൂയിസ് കണ്ട്രോൾ, ആമ്പിയന്റ് ലൈറ്റിംഗ്, ഓട്ടോമാറ്റിക് ക്ലൈമറ്റ് കണ്ട്രോൾ, കീലെസ്സ് എൻട്രി, പുഷ് ബട്ടൺ സ്റ്റാർട്ട്, മൾട്ടി-ഇൻഫോ ഡിസ്പ്ലേ (MID), ഓട്ടോമാറ്റിക് ഹെഡ്‍ലാംപുകൾ, ഓട്ടോമാറ്റിക് വൈപ്പറുകൾ എന്നിവയാണ് ആൽട്രോസിലെ പ്രധാനപ്പെട്ട ഫീച്ചറുകൾ. സുരക്ഷാ ഫീച്ചറുകളുടെ കാര്യത്തിലും ആൽട്രോസ് മുമ്പനാണ്. ഇരട്ട എയർബാഗുകൾ, ഇബിഡിയോട് കൂടിയ എബിഎസ്, ISOFIX സീറ്റിനായുള്ള മൗണ്ടുകൾ, പുറകിൽ പാർക്കിംഗ് സെൻസറും കാമറയും, മുൻനിര യാത്രക്കാർക്കുള്ള സീറ്റ്ബെൽറ്റ് വാണിംഗ്, ഹൈ-സ്പീഡ് അലേർട്ട് എന്നിവയാണ് പ്രധാനപ്പെട്ട സുരക്ഷാ ഫീച്ചറുകൾ
XE, XM, XT, XZ, XZ(O) എന്നിങ്ങനെ അഞ്ച് വേരിയന്റുകളിലാണ് ടാറ്റ ആൽട്രോസ് വില്പനക്കെത്തുക. പെട്രോൾ, ഡീസൽ എഞ്ചിനുകളിൽ മേല്പറഞ്ഞ വേരിയന്റുകൾ ലഭിക്കുമ്പോൾ ആകെ മൊത്തം വേരിയന്റുകളുടെ എണ്ണം 10. സ്കൈലൈൻ സിൽവർ, ഡൗൺടൗൺ റെഡ്, ഹൈ സ്ട്രീറ്റ് ഗോൾഡ്, അവന്യു വൈറ്റ്, മിഡ്ടൌൺ ഗ്രേ എന്നിങ്ങനെ 5 നിറങ്ങളിലാണ് ആൾട്രോസിനെ ടാറ്റ മോട്ടോർസ് വിപണിയിൽ എത്തിച്ചിരിക്കുന്നത്.
