കൊറോണ വൈറസുമായി ബന്ധപ്പെട്ട് വിവാദ പരാമർശവുമായി ബ്രിട്ടീഷ് സാമ്പത്തിക ശാസ്ത്രജ്ഞൻ ജിം ഓ നീൽ. ഇന്ത്യ പോലുള്ള രാജ്യങ്ങളിലല്ലാതെ ചൈനയിൽ കൊറോണ വൈറസ് പൊട്ടിപ്പുറപ്പെട്ടതിന് ദൈവത്തിന് നന്ദി പറയുന്നുവെന്ന് അയാൾ പറഞ്ഞു.ഇന്ത്യൻ നേതൃത്വത്തിന് വൈറസിനെ ചെറുക്കാനുള്ള കഴിവുണ്ടാകുമായിരുന്നെന്ന് കരുതുന്നില്ലെന്നും നീൽ കൂട്ടിച്ചേർത്തു.
ചൈനീസ് മോ‌ഡൽ മികച്ചതാണെന്നും ഇന്ത്യയിലായിരുന്നു കൊറോണ ആദ്യം വന്നിരുന്നതെങ്കിൽ അതിനെ ചെറുക്കാനുള്ള സംവിധാനങ്ങൾ അവിടെയുണ്ടാകുമായിരുന്നില്ലെന്നും ജിം ഓ നീൽ പറഞ്ഞു. അതോടൊപ്പം പാശ്ചാത്യ രാജ്യങ്ങൾ ചൈനയെ അനുകരിക്കണമെന്നും അയാൾ കൂട്ടിച്ചേർത്തു.
അതേസമയം, ജിം ഓ നീലിന്റെ പ്രസ്താവനയ്ക്കെതിരെ രൂക്ഷവിമർശനമാണ് ഉയരുന്നത്. നീലിന്റെ പ്രസ്താവന നിരുത്തരവാദപരമാണെന്ന് ഇന്ത്യൻ ഹൈക്കമ്മിഷൻ മന്ത്രി വിശ്വേഷ് നേഗി പ്രതികരിച്ചു. കൊറോണ വൈറസ് ഭീഷണിയോടുള്ള ഇന്ത്യയുടെ തുടക്കം മുതലുള്ള പ്രതികരണം മികച്ചതാണെന്ന് അദ്ദേഹം കൂട്ടിച്ചേർത്തു