ഭുവനേശ്വർ: ഒഡീഷയിൽ വീണ്ടും ട്രെയിൻ അപകടം. ബർഗഢ് ജില്ലയിൽ മെന്ദപാലിക്ക് സമീപമാണ് ഗുഡ്സ് ട്രെയിനിന്റെ അഞ്ച് ബോഗികൾ പാളം തെറ്റിയത്. ആളപായമൊന്നും റിപ്പോർട്ട് ചെയ്തിട്ടില്ല. മൂന്ന് ദിവസം മുമ്പാണ് ഒഡീഷയിലെ തന്നെ ബാലസോറിൽ മൂന്ന് ട്രെയിനുകൾ കൂട്ടിയിടിച്ച് 275 പേർ കൊല്ലപ്പെട്ടത്. ഈ അപകടം നടന്നതിന്റെ 500 കിലോമീറ്റർ അകലെയാണ് ഗുഡ്സ് ട്രെയിൻ പാളം തെറ്റിയത്. ഒരു സ്വകാര്യ സിമന്റ് ഫാക്ടറിയുടെ കീഴിലുള്ള ചരക്ക് ട്രെയിനിന്റെ ബോഗികളാണ് പാളം തെറ്റിയത്. ഫാക്ടറി വളപ്പിനുള്ളിലാണ് അപകടമുണ്ടായതെന്നാണ് റിപ്പോർട്ട്. ഈ അപകടത്തിൽ റെയിൽവേയ്ക്ക് പങ്കില്ലെന്ന് ഈസ്റ്റ് കോസ്റ്റ് റെയിൽവേ അറിയിച്ചു.