വാമനപുരം എക്സൈസ് റേഞ്ച് ഇൻസ്പെക്ടർ ജി. മോഹൻകുമാറും പാർട്ടിയും ചേർന്ന് പാലോട് ജംഗ്ഷന് സമീപം പ്രവർത്തിക്കുന്ന രമണി ആയുർവേദ വൈദ്യശാല & അങ്ങാടി കടയിൽ നടത്തിയ പരിശോധനയിൽ അനധികൃത മദ്യ കച്ചവടം നടത്തിയതിന് പാലോട് പ്ലാവറ ശ്രീനിലയത്തിൽ സദാനന്ദൻ മകൻ അനിൽ എന്ന് വിളിക്കുന്ന അനിൽ സദാനന്ദനെ അറസ്റ്റ് ചെയ്തു കേസെടുത്തു. 250 ml ന്റെ കുപ്പികളിൽ വില്പനയ്ക്ക് സൂക്ഷിച്ചിരുന്ന മദ്യമാണ് പിടികൂടിയത്. കൂടാതെ ഈ കടയിൽ സാധുവായ ലൈസൻസോ, രേഖകളോ ഒന്നുമില്ലാതെ സൂക്ഷിച്ചിരുന്ന 91 കുപ്പി (40.950 ലിറ്റർ ) അരിഷ്ടാസവങ്ങളും പിടികൂടി. അനധികൃതഅരിഷ്ടക്കടയുടെ മറവിൽ ബിവറേജ് ഷോപ്പുകളിൽ നിന്നും മദ്യം വാങ്ങി കൂടിയ വിലയ്ക്ക് ചെറു കുപ്പികളിലാക്കി വിറ്റു വരവേയാണ് പ്രതി പിടിയിലാകുന്നത്. കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമന്റ് ചെയ്തു. വാമനപുരംഎക്സൈസ് റെയിഞ്ച് പരിധിയിലെ മദ്യ-മയക്കുമരുന്ന് വിൽപ്പനയും, നിരോധിത പുകയില ഉൽപ്പന്നങ്ങളുടെ വിൽപ്പനയും മറ്റും സംബന്ധിച്ച പരാതികൾ 0472-2837505, 9400069421 എന്നീ നമ്പറുകളിൽ വിളിച്ച് അറിയിക്കാവുന്നതാണെന്നും, ലഭിക്കുന്ന വിവരങ്ങൾ രഹസ്യമായി സൂക്ഷിച്ച് പരിശോധനകൾ നടത്തി കർശന നിയമനടപടിയിൽ സ്വീകരിക്കുന്നതാണെന്നും എക്സൈസ് ഇൻസ്പെക്ടർ അറിയിച്ചു. പാർട്ടിയിൽ എക്സൈസ് ഇൻസ്പെക്ടറെ കൂടാതെ സിവിൽ എക്സൈസ് ഓഫീസർമാരായ അനീഷ്, ആദർശ്, ഷിജിൻ വനിതാ സിവിൽ എക്സൈസ് ഓഫീസർ ഹിമാലത എന്നിവരും ഉണ്ടായിരുന്നു.
