മോഷണക്കേസില്‍ അറസ്റ്റ് ചെയ്ത പ്രതിക്ക് ക്രൂരമർദനമേറ്റ സംഭവത്തില്‍ തിരുവനന്തപുരം ഫോർട്ട് സ്റ്റേഷനിലെ നാലു പോലീസുകാർക്ക് സസ്പെൻഷൻ.ഗ്രേഡ് എസ്‌ഐ ശ്രീകുമാർ, പോലീസുകാരായ സുനില്‍, സിജുകുമാർ, ഗിരീഷ് എന്നിവരെയാണ് സസ്പെൻഡ് ചെയ്തത്.
ബൈക്ക് മോഷണ കേസില്‍ അറസ്റ്റിലായ ജിനുവിന് പോലീസ് കസ്റ്റഡിയില്‍വച്ച്‌ മർദനമേറ്റെന്ന് ഫോർട്ട് അസിസ്റ്റന്റ് കമ്മീഷണറുടെ അന്വേഷണത്തില്‍ കണ്ടെത്തിയിരുന്നു. കൊച്ചിയില്‍ കസ്റ്റഡിയിലെടുത്ത പ്രതിയെ തിരുവനന്തപുരത്തേക്ക് എത്തിച്ചപ്പോഴാണ് മർദ്ദിച്ചത്. സെല്ലില്‍ കിടന്ന പ്രതിയുടെ മുടി പിടിച്ച്‌ വലിച്ചതിനാണ് ഗ്രേഡ് എസ്‌ഐയെ സസ്പെൻഡ് ചെയ്തത്.
സിസിടിവി പരിശോധിയിലാണ് സെല്ലിലെ മർദ്ദനം പുറത്തുവന്നത്. കൊച്ചിയില്‍ പിടികൂടിയ പ്രതിയെ തിരുവനന്തപുരത്ത് വച്ച്‌ അറസ്റ്റ് ചെയ്തതായി കാണിച്ചതിന് ഫോർട്ട് സ്റ്റേഷനിലെ ഉദ്യോഗസ്ഥർക്കെതിരെ വകുപ്പുതല അന്വേഷണത്തിനും സിറ്റി പോലീസ് കമ്മീഷണർ ഉത്തരവിട്ടു.