ആറ്റിങ്ങൽ ഗവ. ഗേൾസ് ഹയർ സെക്കൻഡറി സ്കൂളിലെ എൻ.എസ്.എസ് യൂണിറ്റ് നേതൃത്വത്തിലാണ് സഹപാഠിക്ക് വീട് ഒരുക്കി നൽകിയത്. സ്നേഹ ഭവനം പദ്ധതിയിലൂടെ സാമ്പത്തികമായി പിന്നാക്കം നിൽക്കുന്ന ഒരു വിദ്യാർത്ഥിനിക്ക് സുരക്ഷിതമായ ഒരു വീട് ഒരുക്കുക എന്ന മഹത്തായ ലക്ഷ്യവുമായി ഇറങ്ങിത്തിരിച്ച എൻഎസ്എസ് യൂണിറ്റിന് ഏവരുടെയും പിന്തുണ ലഭിച്ചു.
എൻ.എസ്.എസ് വളണ്ടിയർമാർ, അധ്യാപകർ, പി.ടി.എ., എസ്.എം.സി., രക്ഷിതാക്കൾ, പൂർവവിദ്യാർത്ഥികൾ, നാട്ടുകാർ, സുമനസ്സുകൾ എന്നിവരുടെ ആത്മാർത്ഥമായ സഹകരണവും ഉദാരമായ സംഭാവനകളും കൊണ്ടാണ് വീട് യാഥാർത്ഥ്യമായത്.
“ഞാനല്ല, നീയാണ്” എന്ന എൻ.എസ്.എസ് മുദ്രാവാക്യത്തിന്റെ യഥാർത്ഥ സാരാംശം ജീവിതത്തിൽ പകർത്തുന്ന ഈ സംരംഭം വിദ്യാർത്ഥികളുടെ സാമൂഹിക പ്രതിബദ്ധതയുടെയും മാനവിക മൂല്യങ്ങളുടെയും മാതൃകയാണ്. സ്നേഹവും കരുണയും കൂട്ടായ പ്രവർത്തനവും കൈമുതലാക്കിയാൽ സമൂഹത്തിൽ വലിയ മാറ്റങ്ങൾ സൃഷ്ടിക്കാനാകുമെന്ന ശക്തമായ സന്ദേശമാണ് ‘സ്നേഹഭവനം’ സമൂഹത്തിന് നൽകുന്നത്.
വീടിൻറെ താക്കോൽ കൈമാറ്റം ആറ്റിങ്ങൽ എം.എൽ.എ ഒ.എസ് അംബിക സ്കൂൾ ഓഡിറ്റോറിയത്തിൽ നടന്ന ചടങ്ങിൽ നിർവഹിച്ചു. ആറ്റിങ്ങൽ നഗരസഭ ചെയർപേഴ്സൺ എം പ്രദീപ് അധ്യക്ഷത വഹിച്ചു. പ്രിൻസിപ്പാൾ ഡി ഉദയകുമാരി സ്വാഗതവും പ്രോഗ്രാം ഓഫീസർ എസ് ടി ലിജിമോൾ റിപ്പോർട്ട് അവതരണവും നിർവഹിച്ചു.