വർക്കലയിൽ പൂവാല ശല്യം എന്ന് പരാതി.

വർക്കല: ഇടവ ഗ്രാമപഞ്ചായത്തിലെ വിവിധ സ്കൂളുകൾ കേന്ദ്രീകരിച്ച് ബൈക്കിൽ എത്തുന്ന സംഘം വിദ്യാർഥിനികളെ ശല്യം ചെയ്യുകയും ബലാൽക്കാരമായി ബൈക്കിൽ കയറ്റി കൊണ്ടുപോകാൻ ശ്രമം നടത്തുന്നതായും പരാതി. രാവിലെയും വൈകുന്നേരവുമാണ് ഇവരുടെ ശല്യം രൂക്ഷമാകുന്നത്. നിരവധി തവണ രക്ഷിതാക്കൾ അയിരൂർ പൊലീസിനെയും അതാത് സ്കൂൾ അധികൃതരെയും വിവരം അറിയിച്ചിട്ടും നടപടി ഉണ്ടാകുന്നില്ലെന്നും രക്ഷിതാക്കൾ പറയുന്നു. ഇടവ വെറ്റക്കട സ്കൂൾ, ഇടവ മുസ്ലിം ഹൈ സ്കൂൾ, വെൺകുളം സ്കൂൾ, കാപ്പിൽ ഹൈസ്കൂൾ എന്നിവിടങ്ങൾ കേന്ദ്രീകരിച്ചാണ് ഹൈടെക് പൂവാലന്മാർ പെൺകുട്ടികളെ ശല്യം ചെയ്യുന്നത്. കഴിഞ്ഞ ഏതാനും ആഴ്ചകൾക്ക് മുൻപ് വെറ്റക്കട സ്കൂളിലെത്തിയ വിദ്യാർത്ഥിയെ ബൈക്കിലെത്തിയ ഒരു യുവാവ് കുട്ടിയുടെ കയ്യിൽ പിടിച്ച് തട്ടിക്കൊണ്ടു പോകാനും ശ്രമം നടന്നു. രക്ഷിതാക്കളുടെ പരാതിയെത്തുടർന്ന് യുവാവിനെ പൊലീസ് കസ്റ്റഡിയിലെടുത്തെങ്കിലും പിന്നീട് ഇയാളെ വിട്ടയച്ചു. കുട്ടി മാനസികമായ സംഘർഷത്തെ തുടർന്ന് ഇപ്പോൾ സ്കൂളിൽ പോലും പോകുന്നില്ല. ഇവിടെനിന്നും ടി. സി വാങ്ങി മറ്റൊരിടത്തേക്ക് പോകാനാണ് കുട്ടിയുടെ മാതാപിതാക്കളുടെ തീരുമാനം. കസ്റ്റഡിയിലെടുത്ത യുവാവ് ക്രിമിനൽ പശ്ചാത്തലമുള്ള ആളാണെന്നും വർക്കലയിലെ ഒരു ഓട്ടോറിക്ഷാ ഡ്രൈവർ ആണെന്നും പൊലീസ് കണ്ടെത്തിയിരുന്നു. ഇയാൾ ലഹരിക്ക് അടിമയാണെന്നും പെൺകുട്ടികളെ വശീകരിച്ച് അനാശാസ്യ കേന്ദ്രങ്ങളിൽ എത്തിക്കുന്നതിൽ പ്രധാന കണ്ണിയാണെന്നും സൂചനയുണ്ട്. ഇയാളുടെ പിന്നിൽ വൺ റാക്കറ്റ് പ്രവർത്തിക്കുന്നതായും വിവരമുണ്ട്. കുട്ടിയെ തട്ടിക്കൊണ്ടുപോകാൻ ശ്രമം നടന്നതോടെ മറ്റു രക്ഷിതാക്കളും ഭയത്തിലാണ്. പലരും കുട്ടികളെ രാവിലെയും വൈകുന്നേരവും ഒപ്പം കൂടെ കൂട്ടിയാണ് സ്കൂളിൽ എത്തിക്കുന്നതും തിരികെ കൊണ്ടുപോകുന്നതും . ആഡംബര ബൈക്കുകളിലാണ് പൂവാലസംഘം സ്കൂളിന് മുന്നിൽ എത്തുന്നത്. പൊലീസും സ്കൂൾ അധികൃതരും നിസഹായരായി മാറി നിൽക്കുന്നതായും ആക്ഷേപമുണ്ട്