രാജ്യം ഏറെ ആകാംക്ഷയോടെ കാത്തിരിക്കുന്ന തിരഞ്ഞെടുപ്പാണ് തലസ്ഥാനേത്തേത്. നിലവിടെ രാഷ്ട്രീയ സാഹചര്യങ്ങളുടെ അടിസ്ഥാനത്തിൽ അരവിന്ദ് കെജ്രിവാളിന് ഭരണത്തുടർച്ചയുണ്ടാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. അതേസമയം തലസ്ഥാനത്ത് അധികാരത്തിലെത്തുക എന്നത് ബി.ജെ.പി അഭിമാനപ്രശ്നമായാണ് കാണുന്നത്. തിരഞ്ഞെടുപ്പിന് ദിവസങ്ങൾ ബാക്കി നിൽക്കേ ന്യൂസ് എക്‌സ്-പോൾസ്ട്രാറ്റ് അഭിപ്രായ സർവെ ഫലങ്ങളാണ് ഇപ്പോൾ പുറത്തുവന്നിരിക്കുന്നത്.
തിരഞ്ഞെടുപ്പിൽ ബി.ജെ.പി നേട്ടമുണ്ടാക്കുമെന്ന് സർവെ പ്രവചിക്കുന്നു. എന്നാൽ അരവിന്ദ് കെജ്രിവാളിന്റെ നേതത്വത്തിൽ ആം ആദ്മി പാർട്ടി വീണ്ടും അധികാരത്തിലെത്തും. 70 അംഗ നിയമസഭയിൽ 53 മുതൽ 56 വരെ സീറ്റുകൾ നേടിയാണ് അധികാരത്തിലെത്തുക. എന്നാൽ 2015ൽ നേടിയ ചില സീറ്റുകൾ ഇപ്രാവശ്യം ആം ആദ്മി പാർട്ടിക്ക് നഷ്ടപ്പെടുമെന്നും സർവെയിൽ പ്രവചിക്കുന്നു. കഴിഞ്ഞ പ്രാവശ്യം 70ൽ 67 സീറ്റുകളും നേടിയാണ് ആം ആദ്മി പാർട്ടി അധികാരത്തിലെത്തിയത്.
ബി.ജെ.പിക്ക് കഴിഞ്ഞ തവണത്തേക്കാൾ മുന്നേറ്റം നടത്താനാകും. കഴിഞ്ഞ തിരഞ്ഞെടുപ്പിൽ ബി.ജെ.പിക്ക് നേടിയത് വെറും മൂന്ന് സീറ്റുകളായിരുന്നു, ഇപ്രാവശ്യം ഇത് 12 മുതൽ 15 വരെ ലഭിക്കുമെന്നാണ് പ്രവചനം. കോൺഗ്രസ് 2 മുതൽ നാല് വരെ സീറ്റുകൾ നേടും. 48.56 ശതമാനം വോട്ട് ആംആദ്മി പാർട്ടിക്ക് ലഭിക്കുമ്പോൾ 31 ശതമാനം വോട്ടാണ് ബി.ജെ.പിക്ക് ലഭിക്കുക.
