ലോക്ക് ഡൗണ്‍ നീളുന്ന സാഹചര്യത്തില്‍ ബോളിവുഡില്‍ ഉള്‍പ്പെടെ പ്രധാന താരങ്ങളുടെ സിനിമകള്‍ ഡിജിറ്റല്‍ സ്ട്രീമിംഗ് പ്ലാറ്റ്‌ഫോമിലൂടെ റിലീസിലേക്ക് കടക്കുകയാണ്. തിയറ്ററുകള്‍ എന്ന് തുറക്കാനാകുമെന്ന കാര്യത്തില്‍ അനിശ്ചിതത്വം നിലനില്‍ക്കുന്നതിനാല്‍ മാര്‍ച്ച്, ഏപ്രില്‍,മേയ് റിലീസുകളായി പ്ലാന്‍ ചെയ്തിരുന്ന സിനിമകളാണ് വിവിധ ഒ.ടി.ടി പ്ലാറ്റ്‌ഫോമുകള്‍ വഴി റിലീസ് ചെയ്യുന്നത്. മലയാളത്തില്‍ ആദ്യമായി ഡിജിറ്റല്‍ റിലീസിന് തയ്യാറെടുക്കുകയാണ് ജയസൂര്യ നായകനായ സൂഫിയും സുജാതയും. നരണിപ്പുഴ ഷാനവാസ് സംവിധാനം ചെയ്ത സിനിമ ഫ്രൈഡേ ഫിലിം ഹൗസിന്റെ ബാനറില്‍ വിജയ് ബാബുവാണ് നിര്‍മ്മിച്ചിരിക്കുന്നത്. അദിതി റാവു ഹൈദരിയാണ് നായിക. ജയസൂര്യയാണ് ചിത്രം ആമസോണ്‍ പ്രൈമിലൂടെ റിലീസ് ചെയ്യുമെന്ന് പ്രഖ്യാപിച്ചത്. സൂഫിയും സുജാതയും പോസ്റ്റ് പ്രൊഡക്ഷന്‍ ജോലികള്‍ പുനരാരംഭിച്ചിട്ടുണ്ട്. ദിവസങ്ങൾക്കു മുൻപ് സൂര്യയുടെ 2ഡി എന്റര്‍ടെയിന്‍മെന്റ് നിര്‍മ്മിച്ച് ജ്യോതിക നായികയായ ‘പൊന്‍മകള്‍ വന്താല്‍’ എന്ന സിനിമ ഡിജിറ്റല്‍ റിലീസ് പ്രഖ്യാപിച്ചത് തമിഴകത്ത് വലിയ വിവാദങ്ങള്‍ സൃഷ്ടിച്ചിരുന്നു. ബോളിവുഡിൽ അമിതാബ് ബച്ചനെയും ആയുഷ്മാന്‍ ഖുരാനയെയും നായകന്മാരാക്കി ഷൂജിത് സര്‍ക്കാര്‍ സംവിധാനം ചെയ്ത ഗുലാബോ സിതാബോ ആണ് ബോളിവുഡില്‍ ആദ്യം ഡിജിറ്റല്‍ റിലീസ് പ്രഖ്യാപിച്ചത്. 51 വര്‍ഷത്തെ അഭിനയജീവിതത്തില്‍ ആദ്യമെന്നാണ് ബച്ചന്‍ ഇതിനെ വിശേഷിപ്പിച്ചത്. ആമസോണ്‍ പ്രൈം ആണ് ഗുലാബോ സിതാബോ പ്രേക്ഷകരിലെത്തിക്കുന്നത്. ഡിജിറ്റൽ റിലിസിനെതിരെ തിയറ്റർ ഉടമകൾ ഇപ്പോഴും ശക്തമായ പ്രതിഷേധം തുടരുകയാണ്
